قالت حبيبي…. الشاعر ماجد العنزي

قالت حبيبي يمكن آغيب عنّك
لا غبت عنّك اترك الهمّ لا هنت

وآبيك تدري يا هوى البال إنّك
تسكن بقلبٍ من عروشه تمكنت

وفي صدر يشهق حلو الأنفاس منّك
وفي عيني الّي شوفها انت كوّنت 

قلت الهوى يا بنت ماهوب فنّك
قلت الهوى ما يقبل البعد يا بنت

إن كان حبّك خيّب اليوم ظنّك
آنا عليه اليوم يا بنت ادمنت 

في غيبتك والبعد يا بنت كنّك
ترميني ابسجنٍ له الهجر اعلنت 

سجن الألم بعيون ياما بكنّك
سجن الشقا في ليل بحضانه ادفنت

سجن الدموع الي بشعري حكنّك
هذا الغياب الّي ب آهاته اسجنت 

مالك ومال البعد والشوق حنّك
قبل الغياب البعد جرحٍ له ايقنت

شوفي عيون النّاس عندي قرنّك
بحروف شعرن في بناها تفننت 

فيها نظمت اشواق قلبٍ خذنّك
من عالمٍ مجهول عن عرفه اضغنت 

ليه الغياب الّي عليه اشتكنّك
عروق قلبٍ في شقاها تهاونت

قالت حبيبي يمكن آغيب عنّك
ما تدري إني قربها اليوم ادمنت 

#بقلم
#الشاعر_ماجد_العنزي