ليه الفقير ان مات محدن درا فيه !
ولايلتقى حفار يحفر ترابه
مسكين محدن جاب ذكره وطاريه
لحدن خشع للموت ولحدن درا به
أما الغني ان مات الكل ياجيه
يتسابقون عليه مثل الذيابه
اللي يمسح جوخ يندب ويرثيه
واللي يقول فلان حنا صحابه
وحده حبيب القلب والناس تبكيه
ادموعهم من زيف هلت سحابه
المال بعدالموت ماعز راعيه
محدن خذا وياه الا زهابه
زهابه الاعممال من صنع اياديه
محدن خذا من المال حجم الذبابه
والعلم عندالله عالم خوافيه
لاشك بعد الموت يلقى حسابه
اما جنان الخلد حقق امانيه
واما سعير النار زاد التهابه
اتقن عمل دنياك باكر تلاقيه
دنياك بالاعمال دعوة مجابه
اللحد عند الموت ايضم راعيه
الله عليم اشلون سبة عذابه
صحيفة الاعمال راحت بياديه
ليوم الحساب يكون بيده كتابه
سبحان رب الكون جل بعلاليه
للطاعة والغفران مفتوح بابه......
الشاعرخليل الحمود
ليست هناك تعليقات:
إرسال تعليق