قطفت لك وردة غلا .. جيتك وانا كلي شعر
من فرحتي أحس نفسي .. طايرة فوق السحاب
أنا ادري انك لآخر اشعاري .. تلهّف تنتظر
وأنا ادري بقلبك .. إلى منّه سمع بالشعر ذاب
الشعر له موقف .. وانا اعطيك عنّه مُختصر
ما كل من يطرق على ابوابه يحصّل له جواب
بعض المعاني تختفي ما بين تلّميح وصور
والبعض منها واضحة كنّك بتقرا لك كتاب
والشاعر اللي يجبر المعنى يطيعه لو كبر
تلقاه دايم ما يروز الا الجزيلات الصّعاب
وانا افتخر بالشعر ما دامه عن احساسي نشر
واطوّعه حسب اختياري .. حب والا بالعتاب
ونرجع لموضوعك ترى ..فيك القصايد تنبهر
وهي تحسد المعنى تشوفك فيه في عين الصواب
يا ملهم اشعاري فرح .. والحزن قفّى منتحر
فيك البراءة حصّلت .. درب الذهاب ابلا إياب
اللهفة اللي داخلي .. ماهي معك يوم او شهر
تبقى معي إلا إذا .. جسمي يواريه التراب
وغلاي حتى لو أخفّيه .. بعيوني لك ظهر
ترى العيون اتبيّن الشخص بسعادة أو عذاب
كلمات توفيق العطنه
ليست هناك تعليقات:
إرسال تعليق