احمد المقبالي

للآخــره ودنيــاك أعــمل سويــه
قبل الممات وقبل مايفوت الاوان

دينك صلاتك واليدين العطيــــه
والوالدين وحبهم أكبر أحســــان

أحزم في عزمك وأرفع المعنوية
وأثبت مع العالم على كل ميدان

العلم يــرفــع رايتك عــ الثريــــة
ويبني من العزه بيوتً وتيجــان

والرفقه تــقودك كقــود المطيــــه
عن تغفلك بالدرب من دون حسبان

وأختار في الصحبه محازم قويه
لادبرت توقف مواقيف شجعــان

والهرج يوزن لاتسوق الخطيــــه
تجرح سببها قلب خافي ونسيان

خلي المعاني فــي المجالس نقية
ترزح بكف جبال حــارم وسمحان

ومن جاب عرض الناس أكبر ردية
باكر يدور الوقت ويصير مهتــان

أحفظ لسانك عن عروض البريــه
ولاتأكل لحــوم البشــر ظلم بهتان

أنصح عسى تكفي شرور البليــــة
ولاتحتشر من كلمة فلان وفلان

راقب لذاتك  لاتشوف االبقيــــة
الله حسيب الناس زودً ونقصان

عشنــا الحداثه ولاتغيب الهويــة
يبقى لنا ماضي حشيمه ونيشان

شيابنــا وصــوا علينــا وصيــــة
وأحنا حملناها الوصية إلى الآن

أحمد المقبالي