يابنت صبري....زايد الحارثي

يا بنت صبري نفذ والجهد ما به جهــد
والوضع حساس ما يقبل مزيـد انتظار

ان كان لي في حياتـــك عهـد ولا وعـــد
لا تقطعــين التواصــل بيننــا والحـــوار

تدرين كــم نالني في غيبتــك من نكـــد
وانا انتظـر جــيّتــك في ليـــل ولا نهــار

ان كانت المسألـــه بالعــذر عذري مــدد
على مدى الوقت وانا اصرخ بكل اعتذار

وان كان يا بنت قدري صار صفر العدد
قولــي وخلينــي القـــى عـن ديارك ديار

والنفس تتبع هواهــا فـي نظــام البلـــد
حــرّه ولك يا الغلا حـــرّيــة الاخـــتـيــار

وان كان لا فابشري تستاهلين السعـــد
رضاك يا روح روحـــي فــوق كل اعتبار

نهـــارالاثنيــن انا وانتي نهــار الأحـــد
والفصــل بينـي وبينــك يشبــه الانتحـار

حبك ثبت في شغاف القلب مثل الوتــــد
صـعب انتزاعـه وله بين الحــنايا مســار

يا بنت طــال الحــكي والجــوّ برق ورعد
والخيـر كلـه بقــلّ الهـــرج والاختصـــار

هيا ارجعــي طالما في الوقت باقـي بعـد
فالحــب في وضعنا مـثل السفر بالقطار

اذا تعــدّى المحــطه صـعب يـرجـع أبــــد
والضغط اذا زاد عــن حده يصير انفجار
                          زايد الحــارثي