ابو هيثم المعشني

وحدك غريب المباسم من دون كل البشر
ابضحكتك عمر كامل وأيام ماضي قريب

أنوار حلو النواظر من ساجيات النظر
وخدود وردٍ تفتّح ساعه وساعه يغيب

نسمات جوٍ خريفي ابثوب باهي خَضَرْ
لما الضباب الرمادي استدل ستاره العجيب

وأصبحْت في لون ريفي نبض الثرا والشجر
حُسن الروابي المزركش فيض الجَمال السكيب

فيك الوصوف النقيّه يا سحر حالي أسر
كلك بعيني مكمّل وانته عيوني حبيب

روحك بروحي نديّه زخّاتها كالمطر
تسري بدمي شعائر واحساس دايم رهيب

الهمْتني العيش هاني حاضر ولّا في سفر
دنيه وحلوه هنيه والصدق فيها رقيب

من سلسبيل الأغاني عذب المدامه حضر
العاطفه شكل ثاني والجو عُذري غريب

يا ساجعات المعاني من يوم فزّ القمر
ذاب الحلا من شعاعه وامسى بقلبي رطيب

انته الهنا والسعاده والغير  عندي أثر
يا سلوتي في زماني يا خاطري واللبيب

جمعنا طيب المشاعر هذا  القضا والقدر
شوف الأماني حبيبي صارت بالواقع نصيب

ابوهيثم.