زايد الحارثي

ياحمود وينك لي مع الحظ قصه
عيّـــت تغيرهــا الليالــي والايـام

تعبت وانا اقطع من الدرب نصـه
واضيع وارجع للبدايه قبــل عــام

مـع الحبيب اللـي انفرد بالمنصـه
ثم امتلك مني المشاعـر والاحلام

وصــرت انا ويّـاه خـاتــم وفصّــه
لا قــال هــــيا قــلــت قـدام قـدام

على الوفا كـلاً عرف وش يخصـــه
والطير غنـى اشواقنا لحن وانغـام

ياحمود هـذا الحال خصّـه وقصّــه
مع الحـبيب اللي عشقته من اعوام

واليوم غيّــر صاحـب النـصّ نصّـه
واحلامنـا صارت خيالات واوهـــام

أوّاه مـن خلّـي بَعَــدْ ألــف حصــه
حُـبّ وغلا يبيعــني جــلد وعظــام

حظي وانا ادرى به دم القلب مصّه
يهــوى اليمن لا شافني متجه شام

ولو نبت لـي ريـش جــانــي وقصّـه
يا حمود لــو يقدر حكمني بالاعدام
                           زايد الحارثي